Da Skikurs in Kitzbühel 4.4.2022 - 8.4.2022 4D

Wir gebn eich moi a bissi an Eindruck wi de Skiwochen so obglaufn is für uns, dass ihr eich vielleicht nu auf Schlimmes einstün kinnts.
Fong ma moi mim wichtigsten o. Des Essen woar guad, oba a nua wegen de vier Gänge - und wer kummt sunst auf die Idee mit da Apfel-Pfefferminz Suppn? Mim Pyjama und da Jogginghose sama imma do gsessn, außa am Galaabend, do woar ma olle fesch beinond. De Tischgespräche üba Schnecken und Co woarn fia de an witzig, fia de ondern ned so. Da Galaabend woar cool. Glocht hom ma olle beim Hochzeitsfotospü. Am erstn Tog hom ma üba Pistnregeln gredt, damits uns ned olle zlegt. Da nächste Obend woar a Spieleobend. Halli Galli woar recht witzig- hod oba zu mathematischen Problemen gführt. De Zimmer woarn sche, genauso wie da Schnee. Vor oim da Fernseha im Zimma mim Netflix Account und des Siaßzaig woar gonz erträglich. De Nachtruhe woar um zehn, do san ma natürlich scho olle gonz brav im Bett gleng ;) Schluss mit lustig: Da Wecka der ab vier in der fria dauerhoft gleit hod, hod sogor in frühn Vogi umghaut. Noch dem Motto: Boid am Morgen raus aus da Kisten und direkt auf´d Pistn. Glernt homa olle wos, kina damas imma nu ned. Blaue, rote oda schworze Pistn, higfoin san ma olle moi, aussa da oane, der scho am 1. Tag positiv woar. De long ersehnte Mittagspause- endlich gibt’s a Jause. Auf da Hittn woarn ma olle gemeinsom beinond, an Spaß hom ma ghobt ollerhond. Egal ob Germknädl, Spaghetti oda Pommes- gschmeckt hods uns imma. Donn is weitagonga auf d’Pistn, do hots uns olle wieda higschmissn. Versuacht hom ma in ana Reih z‘foarn, des woar a richtiger Schmoarn. Noch kurza Zeit hom ma aufgebn, schließlich san olle scho am Bodn glegn. An Nochmittog hom ma uns zu dritt höfn miaßn, de Bessern hom de Onfänger und Onfägerinnen wos beibrocht, zumindest homs es versuacht. Da Schnee hod scho passt fürn Aprü. Amoi hods grengt, sunst hod oba de Sunn imma an Grinsa aufghobt. De Folge woar donn a bissl a Sonnenbrond, oba oan hods gonz gewoitig troffen. Der woar überall im Gsicht rot, aussa do, wo a de Brün aufghobt hod.
Im Großen und Gonzen woars a witzige Wochn, de wos uns imma in Erinnerung bleibn wird.